“Nik egingo nuke euskaraz, baina ez dut koadrilako ardi beltza izan nahi”. Horixe koadrila euskalduna baina erdaraz aritzen dena duen Haritzen esana. Horri tiraka ekin diote NOLA ENTZUN HALA ERANTZUN atalari Ainhoa Lasak eta Nekane Zinkunegik. EGIN KONTU tartean, berriz, Petra Elser elkarrizketatu dute; bere kabuz euskaldundutako alemaniarra, eta gaur egun etorkinei euskalduntzeko laguntza eskaintzen diharduena.
Mar 12
Ainhoa Lasa EMUNeko teknikariaren eta Nekane Zinkunegi esatariaren ahotsez soilik osatu da gaurko saioa. Izan ere, Nekanek berak ekarri du NOLA ENTZUN HALA ERANTZUN atalean lantzeko gertaera: “Menua gaztelaniaz duen taberna batean, bokatak euskaraz idatzita eskatu genituelako zerbitzaria haserretu zen, sukaldariak ez zekiela euskaraz-eta”. EGIN KONTU atalean, berriz, euskalapp ekimena hartu dute hizpide, gailu elektronikoetarako euskarazko aplikazioak sortzen dabilen talde bat hain justu.
Mar 05
Azentu hegoamerikardun gaztaina saltzaileari euskaltegiko irakasleak: “jarri dozenako zorroa”. Eta euskaltegiko ikasleak harrituta: “¿Cuánto es?”; Saltzaileak egoera ikusita irribarrez erantzuna: “bi euro”. Gertaera horretaz aritu dira gaurkoan Ainhoa Lasa eta Nekane Zinkunegi NOLA ENTZUN HALA ERANTZUN atalean. EGIN KONTU-n, berriz, Iñaki Arantzabal informatikariak liburu elektronikoen inguruko aholkua eman du.
Ots 26
“Ulertuko ez didalakoan, nekatu egiten naiz euskaraz hizketan”, “Hitz egin duzu berarekin horretaz?”, “Ez…”. Nola jakingo dugu orduan, zer pentsatzen duen beste hiztunak guk euskaraz hitz egitearen inguruan? Horixe izan dute hizpide Ainhoa Lasak eta Nekane Zinkunegik gaurko NOLA ENTZUN HALA ERANTZUN atalean. Egokiena hiztunen artean hitz egin eta negoziatzea dela ondorioztatu dute. EGIN KONTU tartean, berriz, Aritz Larreta izan da gaurko gonbidatua, eta honek, euskal udalekuen berri eman du.
Ots 19
Ainhoa Lasa eta Nekane Zinkunegirekin batera, Zigor Etxeburua izan da gaur Gureaz Blai saioan. Gipuzkoako Foru Aldundiko Euskara Zuzendaria da Etxeburua, eta Gipuzkoako 36 udalek, Gipuzkoako Foru Aldundiak, UEMAk eta Urola-Kostako Mankomunitateak lan kontrataziorako hizkuntza irizpideetan lorturiko adostasunaz mintzatu gara berarekin.
Ots 12
“Berrogei urte herrian, eta oraindik ez du ikasi” VS “Bai, baina hori iritsi berria da. Denborarekin ikasiko du”. Batzuei bai eta besteei ez? Euskaradunak ez direnen artean ezartzen ditugun mailaketez mintzatu dira gaurkoan Ainhoa Lasa eta Nekane Zinkunegi NOLA ENTZUN HALA ERANTZUN atalean. EGIN KONTU tartean, berriz, Larraitz Madinabeitiak azaldu dizkie lan arloa euskalduntzeko dauden trebakuntzak.
Ots 05
Gasolindegiko ordainlekuan hiru hatz altxata “kobratu hirugarren kaxakoa mesedez” esan eta bertakoak: “no le entiendo, hableme en castellano por favor” erantzunez gero, zer egingo zenukete? Egoera hori eta ingurukoen artean portaera horrek izandako eraginaz aritu dira gaurkoan Ainhoa Lasa eta Nekane Zinkunegi NOLA ENTZUN HALA ERANTZUN atalean. EGIN KONTU tartean, berriz, Larraitz Madinabeitia elkarrizketatu dute lan munduan euskalduntzeko trebakuntzen inguruan.
Urt 29
Gaurko Gureaz Blaiko lehen atalean, erdal elebakar baten honako esaldia hartu dute hizpide Ainhoa Lasak eta Nekane Zinkunegik: “¿y qué pretendes, que yo no me entere? porque ya lo he intentado, y no es nada fácil”. Hortik abiatuta, hizkuntza espazioen inguruan aritu dira hizketan. Egin kontu atalean, berriz, Badubada erakusketako familia tailerrez aritu dira, Gorka Lazkano tailer dinamizatzailearekin, eta Aitor Manterola tailerretan parte hartutako herritarrarekin.
Urt 22
INFOZAZPI IRRATIA
HARREMANAK:harremanak@info7.eus - Iragarkietarako: iragarkiak@info7.eus
Telefono zenbakia:(0033) 5-59-47-84-91
